鬼節鬼書特別多，《有鬼》封面似足一道符咒。作者 Roy自稱 6歲盂蘭節時始見鬼，自此開展見鬼生涯。所載每段故事由對白到場景都巨細無遺，撞鬼人士口吐異物打道士、街頭如廁惹邪靈，戲劇效果十足，孰真孰假，毋須考究，但我看了兩個故事，已經無膽看下去了！
http://www1.hk.apple.nextmedia.com/template/apple_sub/art_main.php?iss_id=20100904&sec_id=12187379&subsec_id=12732532&art_id=14414347&cat_id=12790169
有好幾個網友問我本書邊間書局仲有得賣？我亦都好無奈咁回答返佢地，我知道仲有既係係三聯「荃灣、灣仔同旺角新世紀」，其他鋪頭一早已售罄，佢地再追問之下，點解唔再補貨賣？
我係查問之後得出既結果就係因為發行商通常新書新作者一個月先會補一次貨，就係咁，因為我本書係係8月16號先係各大書局公開發售，可能大家都冇諗過本書會係兩星期內售罄，再加上我唔係咩名星名作家既關係，所以各店店長唔會自行補貨，亦可能佢地每日太多書要處理，唔知道邊本書仲有存貨，邊本書再要補貨，要再等到9月16號先會有第一次發行商自行補貨，直到所有存貨售罄再加印，所以出現而家既真空期，其實都係一個好事，至少多人搵佐，到第一次補貨可能會賣得快d。
如果大家仲未搵到既話，三聯「荃灣、灣仔同旺角新世紀」仲有幾本存貨，網友亦可以直接聯絡本人購買，再一次多謝大家支持！
今日放工落佐荃灣，經過書店緊係走上去睇下自己本書又賣成點啦！一入到書店大門收銀處果度，見到有人攞住我本書排隊比錢，老實講我真係第一次見到有人親自攞住我本書係書店比錢，一個四十多歲既中年男人，我緊係唔放過呢個機會走上前問下佢。
我：「先生！可以講兩句嗎？」
佢：「……我好趕時間！」
我：「先生！我唔會阻你好耐，只係問幾句！」
佢：「唔好意思！我咩保險呀！投資理財都有齊晒喇！你搵第二個啦！我幫你唔到架！」
我：「先生！我唔係黎sell咩野架！我淨係想問你點解會買呢本書？」
佢：「書？」
我：「係呀！你啱啱比錢買果本書。」
佢：「你係書店定係出版社架？你問黎做咩架？」
我：「唔好意思，我係呢本書既作者。」
佢：「哦？我睇唔似係你寫喎！」
我：「……點解咁講呢？」
佢：「睇樣你唔似有咁多經歷，同埋你唔似可以寫到咁既故事出黎！」
我：「……」
佢：「其實我約佐朋友但係又未夠時間，所以黎書店行下，打發時間，我見到呢本書個cover幾吸引，所以攞上手睇下係咩黎囉，點知道睇下睇下又停唔到。」
我：「停唔到？」
佢：「係呀！故事寫得好緊湊，好有電影feel，真係一睇就停唔到要追落去，我見約佐人又要趕住走！本書個價錢唔算貴又咁厚，所以咪買佐佢囉！」
我：「多謝你！」
佢：「可以幫我簽個名嗎？」
我：「當然可以。」
一直以黎，我都認為買我本書既朋友們都係有聽過同睇過我既blog先會支持下我，我冇諗過竟然會有其他朋友會支持，身為作者既我，同樣感受到呢份支持同鼓勵，感到熱淚盈眶。多謝！
自從上次新書《有鬼》簽名會發行以黎，足足都有一個月，係呢一個月以黎，我都收到唔少海外fans既訂單，我已經如期寄出，如果當中有fans仲未收到我既書，請email跟我聯絡，我會盡快補回。
至於香港方面，我每星期都會走訪各大書局，睇下個銷售情況，由第一日推出市場以黎，我見到好多書局都放置係當眼既地方，有些書店更加列為暢銷書，多謝各大書店店長幫手推介，我眼見由第一日成幢放係度賣，直到每星期行過都見到少d又少d，直到今日我發現之前有出售既書店都已經售罄！！！更有網友搵佐幾間書店都係賣晒，係呢度我真係要講聲唔好意思！我手上仲有好少量存貨，如果大家需要購買的話，可以直接email聯絡本人，我會安排親自送貨或郵寄，多謝大家支持！
我向大家保證，《有鬼2》故事內容更強，更震撼！有您地既支持，我會繼續努力。
email : roy@roylau.org
當我聽到菲律賓挾持人質事件當中，最後係八死兩重傷完結之後，我心情真係好不安，原本已經係行程既最後一日，點都估唔到會有咁既事發生，聽到有關既報導，槍手係揀佐外國既遊客下手，因為佢知道咁做先會得到社會各界關住。
係呢次事件當中，其實係下午送飯果陣點解唔試下係d飯度落安眠藥？等藥力發作之後可以上車救人質。當然，我都唔知道可唔可行，至少，我就真係唔明咩叫特種部隊？唔係受過專業訓練既咩？點解會好似咩都唔知道就走去救人質？
記得九三年，我同樣都遇上過一次挾持人質事件，地方同樣都係菲律賓，係馬尼拉市中心一間叫《手拉手》夜總會裡面，當時亦有其他旅行團一齊睇表演，可以話係坐無虛蓆，同樣我都係做旅行社既領隊，我帶住一團三十多人團友正在睇表演，而兇徒就係呢間夜總會工作，因為前一日無故被公司辭去工作，所以夜晚潛入表演台挾持當時係度正在表演中既魔術師。
當時，個兇徒手上攞住兩個手榴彈，一初我地以為係表演既一部分，所以大家都不以為意，直到個魔術師走離台上高聲大叫「help me!!!」之際，有幾個攞鎗既警察走上台之後，大家先知道當時唔係表演，之後場面一片混亂。
混亂之際，當地個導遊一手拉住我走出外面，當然，好在個兇徒被制服，先至不至於有傷亡發生，因為第二朝個導遊同我講，佢話果兩個手榴彈係真既！我聽到之後先至識得驚！
係今日發生既事件中，我為不幸死去既香港人禱告，希望佢地得以永生，其他獲救或仍然留院既人，努力呀！加油呀！一定要撐下去！
下一秒鐘大家都唔知道會發生咩事，活在當下，珍惜眼前人！
自從本書出街之後, 當然收到有讀者既email提出本書各方面既野, 就好似個cover, 唔少人話正!!! 當然都係黎自本人親自design, 至於個size, 因為太厚既關係, 所以好難揭, 呢樣我都知, 所以下一本應該唔會再用呢隻紙, 其實仲好可以平好多, 當初揀呢隻紙係因為個手感原故, 再加上印出黎之後似舊式小說feel.
屋企人睇完之後同我話好驚, 緊係, 因為我講述小時侯既地方, 大部分都係同佢地一齊生活既地方, 一定有所共鳴, 至於又有網友狠批我寫呢本書係似小學生作文, 當然亦有網友話冇咩高潮起跌, 有彈都有讚, 有網友讚我寫得好到肉, 睇到停唔到!!! 而大家同一樣既係話我本書同個blog好唔同, 之前有聽過我d錄音既都話係好好笑, 笑多過驚, 但係相比之下本書就比較嚴肅, 睇落真係似鬼故, 其實原意我都係諗住寫多d笑話, 比大家有一個驚喜!!!
我都想聽多d大家比既意見, 作為下一本書要改善既地方, 如果大家想提出既話可以email比我, roy@roylau.org 多謝!!!
有網友EMAIL問我同我直接買書有咩好處??? 我又好直接答就係可以唔駛比書局食佐我一半錢之餘，同埋你地仲可以有我簽名!!! 因為發行商會抽佣之餘，大部份都係書店抽晒，係七折八扣之下，我都係得返四成，仲要等一年後先至有錢收!!! 當然話分兩頭，係出面書店買既好處係可以幫我谷吓銷路囉，唔係點可以加印第二第三版??? 我自己果D簽名本只餘下廿多本，今次真係賣晒就冇!!! 我係度再三多謝每一位支持我既Fans，多謝!!!
各位海外fans, 如果大家想訂購<有鬼>呢本書既話, 大家可以email比我, 我會付上親筆簽名. 香港fans如果等唔切書局發售既話, 都可以搵我直接訂, 呢兩日星期六日我都可以係所有地鐡站交收比大家!!! 多謝支持!!!
email : roy@roylau.org
好多人都聽過 “一個人如果冇佐夢想，咁就同咸魚冇咩分別!!!” 我既夢想就係出書，上星期日，我終於將自己多年黎既夢想實現，我亦都見證佐我本書既誕生。
今次出書，我當作為中國人第一次火箭升空既創舉，下一步就係要去登陸月球，雖然好似係跨張佐D，不過，開心的確係好開心，因為係呢年幾以黎埋頭苦幹，真係不眠不休，日頭開工，夜晚就開夜車，不停係咁張之前果d錄音轉化做文字，之後就不停去編輯同修改，修改又修改，年復年，日復日，直到出版既一日，當中既努力到今日係冇白費到，我好幸運有屋企人既支持同幫助先得以順利完成，多謝大家!!!
記得啱啱開始編寫既時候，其實我遇上既困難就係唔識點去寫，正確黎講係一開始其實好多編文都係用佐 “口語化” ，大家可能睇睇下會發現點解會有” 吓，哦，喂” 之類既字，其實之前全編故事都係咁，一初我心諗真係想親切d，好睇d!!! 但係寫好佐成五，六個故仔之後。發覺真係好似唔係咁好，所以問下屋企人同朋友意見，最後大部份都建議我轉返做書寫文。
就係咁，我又用佐成大半年時間將口語化轉為書寫文，之後又遇上一個問題就係點形容好呢??? 就好似口語化講 “咁點好呀???” 書寫文係叫做” 現在怎麼辦???” 對一個攞8u生黎講，真係一個極難既事，仲有既就係錯字，一開始就係咁錯，之後比人改又錯，再改再錯，一直都係錯，錯到去做校對之後先至可以修正返晒，我真係冇諗過我D錯字係咁離譜架!!!
最後，我呢生人要做既野比好多人都好好，我結過婚，有個女，有錢過，亦訓過街，成功過，當然都經常失敗，雖然失敗既比成功既多，付出既比得到既少!!! 但我都好知足，此生無憾!!!
如果大家有夢想既話，唔好理佢大定係細，一步一步咁去做，慢慢就會開始實現，我都可以，你地都一樣可以，夢想成真!!!
送上我近來好LIKE既 農夫作品 24 ，希望大家都LIKE!!!
“有幾多個人有幾多個夢想從來未曾實現”
成日係facebook寫完野又唔記得係自己個blog度post返出黎, 都係個朋友同我講返先至醒起.
講返正題, <有鬼>新書簽名會已經完滿結束, 我係度好想多謝一直支持我既人.
多謝屋企人, 多謝fans們係大熱天時排隊排成大半個鐘到場搵我簽名, 仲有特別多謝fans patpat同money, 專程請半日假過黎支持, 仲買埋好好味既cookie比我, 多謝晒!!!
新書係書展呢幾日已經售出百多本, 成績都算唔錯!!! 聽日開始各大書店公開發售!!!
本人 流料roy 真心真意係度再次多謝各位支持!!! 希望大家鍾意<有鬼>呢本書.
更希望大家比d意見!!! 多謝支持!!!
流料roy
各位FANS:
如果大家有買我本書既朋友, 因為已有朋友同出版社出佐事, 係唔止一個人, 所以為保障閣下安全起見, 請把書包好就應該冇咩事!!!! 多謝合作!!!!
大家好呀!!! 我本新書簽名會呀!!! 多謝支持!!!
7月25日星期日~下午 4 點至 4點半
香港書展2010
攤位號碼: 1A-B02 (紅出版)