活著就係精彩 ● 流料ROY手記

上回講到89年o既我去佐中央百貨做亞四      如果老馮炒我o既話，我大可以去做清潔，尤其是抹玻璃抹到發晒光，啲友成日發梗夢撞入黎，老馮費時撞爛佐要比錢整，卒之叫我唔好抹得太靚，吓？咁都得？係依度做無晒私人時間，不過學倒好多野，淨係施丹果啲劈友技術，每個客入黎一定死係佢刀下，仲死得好慘，個個都一頸血，真犀利！      今朝一早開鋪執緊貨之際，有個亞嬸，年約五十多歲，手抽住紅色背心袋，仲露佐條葱花咁上下o既野出黎，佢走黎問我話：亞哥哥：我要隻海閘牌o既20MB硬碟機，加張RLL 控制卡，最好幫我格式埋呀！我就話：吓？乜卡話，RLL？亞嬸，元洲街街市唔係依度喎？亞嬸又話：亞哥仔，唔好玩啦，我仲要返屋企裝機呀，你快啲好唔好？我好奇怪咁答佢話：亞嬸，20MB硬碟我地有，乜野RLL卡我地都有，但係20MB硬碟機要跟MFM控制卡喎？妳有無攪錯，係咪妳屋企人叫妳買o架？亞嬸好勞氣咁話：哥仔，你識唔識o架？20MB硬碟加RLL控制卡，格式化佐之後，咪有30MB囉！個command 叫 debug g=c800:1000，快啲啦，我趕住走呀！      係依個時候，施丹走黎同我講，佢話咁樣做係可以張20MB谷上30MBo既，不過係會有bad sector！但係20MB同30MB價錢爭成仟銀，所以有啲人會博吓，多多幾MB用都好過無！聽完之後，我今次真係比亞嬸大倒，睇黎深水埗真係一個臥虎藏龍o既地方！既然我入得依行，一係唔做，一做就要黎深水埗一定要搵我！      P.S.當時好多鋪頭會用依個方法出機比人，再搵多成仟蚊，當時黃金商場，真係一個金礦，好多老細係依度搵倒佢地o既第一桶金！  

上回講到89年o既我，去佐中央百貨做亞四      老馮話手板眼見功夫，即係每日開工前要吸塵、掃地、執野、上貨同抹櫥窗，咪即係亞四！鋪頭有個叫[斯丹]，係主力賣野o既要員，每馮鋪頭有乜艇貨，佢一定賣倒，同每日亦都好多人黎朝聖，當時佢係鋪頭o既神。就好似當時o既黑色九針機，因為有四色九針機而艇佐，佢就同啲客講話啲四色針機好慢同啲色帶好貴！所以好快就張三佰幾部黑色九針機走晒！話時話慢係因為溝色果陣，如果印黑色係好快o既，彩色帶係你依度賣得貴啫！(待續)     

上回講到89年o既我，去佐中央百貨見工      行到入鋪頭，第一次見老馮，我問佢係咪請人？佢就話：你之前有無做過？我就話無，跟住佢就話：唔！點解要做電腦？送貨唔好咩？我答話：唔知點解，每次送貨黎依個場，我都好happy，見倒啲電腦，好靚好吸引。老馮又話：唔！人工仟三，返十一晚九半，要OT……，話晒你黎依度學野，乜都要做，有無問題？當時我淨係聽倒佢話請佐我之外，佢跟住同我講乜都聽唔倒，可能實在太happy。      返到公司同老細講唔做，老細好愕然咁問我：外面有送貨人工高過我？唔會啩？你去邊度做呀？我就話：無呀！人工少伍舊，返十幾個鐘，無紅假。老細又話：吓？你頭先送貨果陣，唔係趺懵佐呀？咁你都做？我心諗：我將會學倒o既野，分分鐘可以改變我一生！

上回講到89年o既我，係間trading度做跟車送貨      返佐工成三個月，心諗無死啦，話晒依份工都算半份寫字樓工，放紅日又收六點，又係我第一份長工，老細仲一過probation就加我人工，仲想點？下晝送貨去高登，推住成十個mon，好似座山咁，經過[中央百貨]門口果陣，有個高佬攞住張白紙走出黎，貼佐係塊玻璃上面，張紙寫住[招聘售貨員]，我掛住望張紙之際，就連人帶車同貨，衝佐入去斜對面間game鋪度，180個kgX300磅衝力，可以話張間game鋪差唔多移為平地，場面非常混亂，有人夾佐係間鋪裡面，有人大叫，有人……。而我就行佐入去[中央百貨]……(待續)  

上回講到89年o既我去佐做地盤      日日做到無停手，總有食飯o既時侯！唔經唔覺推住架泥頭車已經個幾月，食飯果陣係度諗，如果繼續做落去，都係無用，正所謂：細時推車，大時揸車！叻極都係做個司機，應該為自已將來諗下！放工搭車果陣，撞見一個舊同學，就係佢介紹之下，去佐間trading公司度做跟車，而依間公司係做批發電腦mon既，個牌子叫TVM，就係咁開始佐我做電腦o既生涯。     第一日返工，就要去送貨，當時公司係主力做TVM依個牌子，佢自稱話啲mon係德國制造生產， 所以比出面一般mon貴成仟銀，成隻mon四四方方又無脚，睇落似收音機，但係又好鬼重，一隻mon成13kg，都有30磅重，老細仲話收得人咁o既價錢，梗係有番咁上下料。      第一次送貨去黄金，已經比啲鋪頭吸引住，唔知點解覺得啲野好新奇，當時有間鋪頭叫[易盈]，佢地show佐部80286同埋thomson mon做display，仲大大個字寫住第一代彩色VGA Mon，畫面真係好靚，但係價錢係5仟幾銀，而我當時係得仟伍銀人工，成部電腦要成萬幾銀，當然我當時唔知佢係乜水。 (待續)

上回講到89年我係渣甸比人篤走佐…      唔做渣甸，做乜好，好在有個做地盤o既好兄弟大B孖佐份地盤打雜比我做，都有五十元日，好過無！佢話全部手板眼見功夫，好易做，我就諗都唔諗就跟佐佢去開工。      開工前同佢去佐食早餐，佢神咁早就食七咁食，我問佢發育時期都過佐，駛唔駛食咁多，佢就話而家先至八點，家陣唔食飽D，一陣你就知，我聽完之後，嗱嗱臨拍佐隻羅米鷄！去到地盤，印象中，超人係戲裡面，只要遞高手一跳就可以飛上天，現實o既工友，並無飛上天，不過，佢地一遞高手，拉住個天秤，就可以飛上五樓，而我當然行樓梯！      我地通常叫地盤工人做老粗，因為佢地除佐粗聲粗氣、句句都爆粗之外，仲就咁週圍疴，第一日開工，工頭叫我去攞架泥頭車黎，我就見倒架車有篤糞係度，好新鮮，因為仲好臭，大B見倒即刻幫我揾水冲佐去，佢話依度係咁，要習慣下個個都貪方便！第一次推住架單轆o既泥頭車，仲要推住幾十磅重o既磚頭，真係命都無，大B見倒又幫我推下，成個早上就係咁推黎推去！好在今朝拍佐隻羅米鷄，如果唔係點頂到食飯。(待續)

上回講到89年o既我，係渣甸做到人都顛……      返工果陣，週街都講緊天安門事件，我仍然係信房做到顛，對住依班友，我就張門口個office service dept名牌改做一個好貼切o既名…庇護工場。公司個亞嬸同我講，佢話部汽水機D可樂無乜，咁即係點？佢叫我拉架車仔去隔幾條街果間惠康度買返五盤返黎，吓？又係我？唔係有得訂同送貨o既咩？      食飯前推佐五大盤可樂返黎，見亞嬸係度整緊部汽水機，原來佢係溝貨賣，可以贊多D。老細發神經突然話要食士多啤梨，要揾人買，仲要指定要中環街市果間生果檔…又係我？      收工果陣，樓上sales同admin dept班友話要去遊行，問我地去唔去？成班庇護工場都好激動咁，個個都話要去，可能亞姐叫到，點都要去下。一個二個攞晒D A4紙係度貼 Banner，又唔知係邊度揾佐D旗仔返黎改，我就係store room揾佐張好Q大o既帆布同地拖黎做大banner，亞姐仲係上面提字添。一行四十幾人好激動出發。      第二朝返到公司，老細又發神經，佢問邊條友攞佐佢要黎笠架大Benz果塊帆布！又比佢見倒庇護工場四個大字！污點証人竟然係亞嬸。人終需要死一次，如果好似尋晚天安門班學生咁轟轟烈烈，又有乜所謂！(待續)

上回講到89年o既我，去佐渣甸見工……      大公司有乜好？勝在夠人多，但係無人很做野。公司有一個大老細、7個經理、23個admin、shipping、11個司機，26個sales…。      第一日返工就叫佐我去信房果度幫手，因為有倆個同事請假，信房每日負責分信、寄信o既工作，聽落好似好簡單，其實係死位黎，做餐死個死。今朝一早有南華早報、英文虎報、東方呀…係分比唔同部門o既經理，仲有D乜野雜誌，好似明週呀咁係比D部門秘書o既，仲有D車書呀、咸書呀係要收埋比D老細o既。再加其他書信，都有幾佰封。成個信房得五個人，本來係無問題，不過，一個係跛o既、一個係聾、一個係啞、一個係盲，得我一個比較健全，有乜法子唔做死呀！      下午返黎又話要寄信，凈係sales D catalog，26個sales，一人三十幾份，都成幾佰份，再加埋其他D雜件，我咁大個仔第一次推車仔去郵局寄信，仲要由側魚涌推去北角呀！(待續)

     89年我攞住8個U畢業，無錯8個都係U，屋企人都好愕然！又係既，屋企8兄弟姊妹，會考真係無人考到咁差！最差果個都5B2C1D，二佬話其實有乜可能，你又有去考試，有答下D題目，都唔應該攞U，我都想知點解，自問科科都有讀過吓，考試又有作答，我都唔明！大佬問我點打算？我就話讀書唔成都無乎，唯有出去闖一闖、博一博。      當年只要行做就無問題，一定餓唔死，中四果陣巳經同班同學係官塘一間工廠度做，間廠係做牛仔褲既，我地負責分碼、打牌同包裝，需然成日開通頂，不過都有成仟5元個月，以PartTime計都好好啦！畢業後我無繼績做，我覺得叻極都係做Line長無野學得個做字，反而去佐渣甸做OfficeBoy，人工差唔多，不過話晒大公司，福利好有前途。      見工果陣，有個30多歲既亞姐，係負責admin既經理，佢同我講，你D咁既廢柴，如果我地請你，你真係執倒，我地咁大間公司，要求好高，唔係咁易入黎做，唔係亞邊個邊個 (我同學個老豆係度做司機) 話比個機會你黎學野，記住你係黎學野，我叫你做乜就做乜，你個廢柴，唔方有人會挖走你，一世都係度做啦！吓…咁係咪即係請我?(待續)