活著就係精彩 ● 流料ROY手記

話說一位朋友介紹左另一位朋友比我認識，而我朋友同我講，佢呢位朋友個女兒好似係撞邪之類，想叫我幫忙求證，我一口答應左佢請求，仲叫佢帶埋個女去我鋪頭。 直到夜晚，呢位女士終於出現，我見到佢有點忐忑不安，我同佢講唔駛擔心，只要望一眼就知道，等左好耐，佢個女兒終於出現，我老遠就見到佢個女兒帶一點點黑氣迎面而來，起初我都冇咩，因為我知道自己店舖內有法器，理應沒法入內，直到佢行到埋身既時候，而佢個女兒一個箭步就行入鋪頭，我有點卻步，原因係點解附係佢身上面隻野可以跟埋入去？ 佢女兒坐低既時候，明顯地帶點囂張，我還見到附在她身上的靈異黑氣，呢個時候我仲驚！知道隻野應該唔野少！我唔知道點形容，因為每次我一見到有個黑色物體會附係個女人身後近頸部位置，我就知道佢可能係做過人工流產抑或有靈體附身。多年來我都只係見到，而不知道係咩原因。當然我會直接同事主講，等佢地知道，當中都幫了不少朋友。 講返件事，我當時真係唔知點算好！因為我未學過法，亦冇驅鬼經驗。認識我既朋友都知道，我每次遇上靈體都會走為上將。今次要我去面對，我都好無奈。突然想起鋪頭有樣好似係驅鬼既符牌，於是我膽粗粗咁攞左出黎，我仲同佢阿媽講，呢件法器應該可以幫到佢。 之後，我打算幫她女兒戴上既時候，佢女兒開始有點不安，還堅決拒絕了，她開始用上海話同佢阿媽講話，事件了擾攘左一段時間，係對話當中我大約聽到好似係佢個女話，我係唔會戴上，我都唔鐘意佢，我都唔信佢，點解要我戴呀？ 我當時真係肴底中，都唔知點好，但見好似唔對路，即時張法器笠係佢頸上，起初我見到佢好似冇咩，之後又好似好平靜，又突然話要走….. 直到收工之後，佢阿媽打比我話佢個女又嘔吐，又話要去自殺！我聽到之後，即刻搵華師兄幫手……事件未完，待續。

3月31日 仍然被一連串的夢圍繞著，今次不同的是，我跟她是身處於家裡在看電視，感覺很溫馨。我仍然刻意地看她的臉容，但仍然看不到。 早上被阿moon吵醒來，感覺有點迷濛，仍舊帶牠外出，回家喝咖啡和睇動新聞。突如其來腦海浮現大約幾日前的一件事情，當晚我是應約一個友人飯局，當中還有卓飛，chris，Ella等人…… 飯後各人在閒聊之間，Ella講起一段靈異片段，更從手上的iPad中展示。 當時我看到一段應該是招魂儀式的影片，大家也在片段中看到一名女子，同樣在猜測這明女子是誰，身旁的一位友人Ken問道 佢：流料，你覺得段片堅唔堅？ 我：梗係流喇！ 佢：點解咁講？ 我：邊有咁靚o既女鬼呀？如果有跟我返屋佐丫！我唔介意架！我會娶埋佢架！ 正正就是這句話，可能，可能就是這樣……

3月30日 今日好大雨，連續不停的下雨。我開車打算到大埔墟午飯和購置一點日用品，當時大雨令到前路迷糊，我只好小心奕奕繼續前行，突然車子自行慢下來，我感到有點不妥，正當心裡想到：「唔係嘛？係呢個時候壞車？」。突然前面小路出大路突如其來的一輛私家車迎面駛至。心想到：「今次仆街了！」。就在這時候，看到它在身旁擦身而過。 不知道是好運抑或是什麼，對頭車擦身而過之後，車子又如常運作起來…….

3月29日 今日如常放工回家，門都未開，阿moon就急不及待衝閘而出，咁多年黎都未遇過呢個情況，當然第一時間拖佐佢出去，大約三十分鐘之後回家，奇怪的是，阿moon死都唔很入屋，我用上九牛二虎之力強行拉佢入屋，我感到有點不對勁。 入到屋之後，阿moon就開始走出走入，神神化化，一啲都唔似之往的牠，狗糧又唔食，成晚就係度”un un”聲，入夜之後，佢明顯有啲失魂落魄感覺，仲不時大聲吠叫…… 連續幾日都有發夢，仍然係街上，身旁仍然有一位女士，我開始刻意去看她的面容，但仍然看不見！但她的身軀清晰可見，只係看不到面容，究竟佢係咩人？我同佢有咩關係？

3月28日 訓醒之後，個人好攰，攰到唔想起身，可能尋晚發左個好長既夢，記得係同一個女人去佐好多地方，做佐好多野，但係又記唔起去過邊？做過D咩野？好奇怪。當我起身落床既時候，發覺地上有尿漬，應該係阿Moon忍唔住，多年黎阿Moon係唔會係房度痾尿，因為佢習慣每朝都會叫醒我放佢出去。 晚上約佐倆位朋友做微異錄訪問，可能大雨關係，倆位朋友同樣遲到，我只好一個人係公司樓下繼續等待，等待期間，我撞見一位多年冇見既前度女朋友，寒喧幾句，得知佢最近離婚，更一個人搬左出黎，佢仲話有時間大家約定食飯，大家仲交換電話。 冇耐應約做訪問既倆位朋友到來，佢地都唔好意思要我等咁耐，我就同佢地講：「好在你地遲到，唔係我點會撞見我舊情人丫！」 「哦？真既？咁都撞見即係有緣啦！」 「都係既……」 「咁你對佢仲有冇Feel先？」 「唔知呀……」 「睇你笑淫淫咁，唔好唔認喇！」 「都……仲有……少少啦！」 「咁有冇問佢攞電話呀？係就食住上喇！」 「梗係有！」 我攞起手上既電話，發覺剛才佢比我個電話號碼不見了……..  

3月27日 跟朋友係長沙灣晚飯之後，我一個人坐巴士回家，汲取之前幾次教訓，我已經唔敢搭尾班車，睇一睇手表應該仲趕得切搭尾二果班車，於是急急步咁行，去到巴士站冇耐，巴士亦隨即駛到，當時我的確有揮手，但係架巴士冇停站，係我身旁駛過。 唔知道係宿命，定係其他，最終我都係搭上尾班車，一上車，我並冇走上樓上果層，係下層經已有一位女士坐係巴士對排位置，而我就坐係佢左手邊對排位置。我聽住歌，一直去到近火炭位置一段高速公路，同時車輛開始慢落黎，見到冇幾遠有閃閃藍光，應該係交通意外。 當時，巴士慢慢駛近意外現場，首先我見到一架貨車，之後到另一架私家車，仲有一男人同一位交通警在對話中，我見到私家車車頭至車身有一點點損毀，唔係太嚴重，，我仲見到有一個女人，佢企左係私家車近車頭位置，巴士繼續緩慢咁駛近，我發覺呢個女人有點怪，睇落唔似係同私家車男司機有關係，因為佢全程都係垂低頭，再望真一點，我發覺佢既衣著服飾好似係似曾相識，係呢個時候，我望向車廂之內，發覺剛才上車時個女人，已經不見了。 當我落車既時候，雨又開始落下，仲好大。遮一開，我就急步走返屋企，係入屋之前，我習慣張把遮掛係花園既圍欄之上。梳洗過後開始我寫書既工作，我喜歡深夜寫書係因為好寂靜無聲之餘，更加唔會有人打擾。突然書檯上既燈閃佐幾下，之後就唔著，屋外傳黎一把女聲，一把好似好辛苦而又尖叫既聲音，再聽真一點，應該係花園果邊傳黎，我鬼鬼鼠鼠咁走到窗前，拉開窗簾一角，我見到有一個應該係女人頭不斷掙扎咁係把遮度轉出黎，呢個時候，我當然以九秒九極速跑上床，大被冚過頭，仲有攞住手機係Facebook求救。    

係大埔墟晚飯之後我一個人搭小巴返屋企，上車之時前面有一對男女，睇背影男人大約五十多歲，而女既大約係廿多歲，佢地應該係倆父女。我一上車就坐佐係最近車門位置，亦即係佢地二人前排，開車冇耐就聽到佢地係後面傳黎既對話。 男：「妳凍唔凍？」 女：「嗯」 男：「凍就同我講！」 女：「嗯」 男：「咁妳餓唔餓？」 女：「嗯」 男：「咁妳餓就同我講！」 女：「嗯」 男：「妳有咩唔夠同我講好嗎？」 女：「嗯」 個女仔問極都係得個「嗯」字 男：「巴士站」 司機隨即揮手示意。當時我係坐係車門隔離，得個男人落佐車。 司機繼續開車駛去，沿途冇咩車，而且好寂靜，心突然有點寒。呢個時候司機打破寂靜自言自語咁講：「個老豆都係關心你啫，唉……而家D後生真係……」。 過多一陣，直到我叫落車既時候，個司機突然同我講：「你唔係落沙田咩？咁夜冇車囉喎！」 我：「我住呢度喎！」 司機：「頭先果個唔係你阿爸咩？」 我：「……」 我隨即轉身一望，車廂空無一人，呢個時候，我只知道又奶野…… 行返屋企果陣想起，印象中，頭先個男人係上次撞野既松仔園落車……

有次係大埔搭小巴返屋企，當時小巴駛近松仔園附近，一位女仕係車廂後坐叫著：「巴士站！」，司機大哥聽到之後，隨即舉手示意。 到佐巴士站之後，當時司機張車門打開，我見到個司機張望個倒後鏡幾秒，隨即回頭一望，當時我係坐係單人位第二個，同樣我都有回頭一望，但車廂之內只得我同司機大哥，於是司機大哥問我： 司機：「喂！你唔係落車咩？」 我：「我未到喎！」 司機：「未到又咁早叫？」 我：「我邊有叫？頭先係把女聲！」 司機：「又好似係喎！屌……」 司機大哥隨即點起香煙開車駛去……

我習慣午飯之後走到公司附近既公園休息下，今日天陰，地上有點濕，應該係落過雨。 步入公園，可能公園係海邊關係，感覺上吹起既風特別寒，我發覺大部分既長櫈都係比較濕立立，我搵佐好幾張，老遠見到有個男人坐佐响度，我並冇留意佢，只係望佢一眼就坐埋一邊，只知道佢係一位中年男人。 而同一時間，呢個男人起身離去，於是我手放在長櫈上，發覺有點濕漉漉既感覺，再望一望長櫈上，發覺剛才身旁果位男人坐著既地方，仍然有一點點水積在長櫈上……

我每日放工都係搭巴士返大埔，港島尾站之後就一直到大埔，有日我坐係巴士樓下果層靠近樓梯位置，有個阿婆係尾站上佐車，佢企係我冇幾遠，大約係上落樓梯既位置，於是我揮手叫阿婆過黎打算讓坐比佢坐，但當時阿婆對住我目無表情咁繼續企响度，我估可能佢唔需要，而我身旁有倆個後生OL企著講話，我聽著歌所以冇留意佢地講話。全程我間唔中都有望一望阿婆，最奇怪既係，點解佢全程都冇捉住又或者扶住身旁既扶手？而且仲比起其他人企得好定。 到大埔落車果陣，我起身打算行出去，我仍然見到阿婆企係樓梯旁，而當時前面有個男人起身，個男人的確遮擋佐我大約幾秒視線，之後阿婆不見了！我開始明白身旁倆位女士有點驚訝的是，阿婆根本唔存在……