已經好幾個月冇經過牛下，今日搭車經過嗰陣，見到開始清拆，諗返起我同牛下有好幾段情緣。
細個嗰陣，我外婆係居住係牛下第八座，我地每個月都會到外婆屋企食飯，屋企八兄弟姊妹，仲有姨媽一家十幾個表兄弟姊妹，再加埋舅父一家，雖然大家擠迫係一個得兩佰多呎既地方，食飯嗰陣仲要係坐係走廊度食，但係都好開心，自從外婆搬佐去彩雲村之後，我對牛下開始生疏。
flora係我中一嗰年認識既女性朋友，我識到佢都算係一個緣份，因為佢係讀上午校，係一次同學追求之下，竟然比我認識到佢，一直以黎，我同佢都係好朋友既關係，無論事無大小我地都傾一餐，而佢係同佢阿嫲居住係牛下十三座，當年，亦有經常到佢屋企食飯，呢段關係直到中四嗰年因為佢要移民美國而告終，往後只係書信來往，記得有一年，佢返黎香港同我講，佢要結婚了。牛下又再一次成為我既回憶。
直到出黎做野，我其中一份工作係做地產經紀，我認識到我既前妻，離開佐牛下足足十年既記憶又再一次返黎，我真係發夢都冇諗過，佢係住係牛下第九座，而外父同外母係居住係十三座，flora屋企既樓下。
牛下呢個地方，足足佔據佐我大半生人既回憶，隨著牛下既遷拆，我知道牛下唔會再出現係我眼前，而我腦海內就只剩下一幕又一幕既回憶。
