童心



Filed under : 流料ROY手記

由細到大,我都好喜歡行玩具店,小學o個陣,每次放學經過學校附近既玩具店,我都會不其然咁企係間鋪頭外面,發呆咁望住個櫥窗,因為櫥窗入面擺放佐一個又一個既超合金,一企就通常都十至十五分鐘,有時仲會比個老細趕走,當然,我通常都係企係外面,從來冇想過有一日可以入去睇o下,甚至可以捉摸o下,因為我身上面根本唔會有多餘既錢。

記得細個果陣玩既玩具,都係阿爸係街度執返黎,執得返黎,通常都係人家唔要,通常都係冇佐個頭,一係冇佐隻手,總係未試過有一個完整。直到小學四年級果年,有個同學佢個阿爸係做警察既關係,所以佢成日都有新玩具玩,呢位同學都好好,至少,可以借比我玩一個小息,一直我都好想擁有一個屬於自己既<高達>模型。

中學既時候,我認識到一位同學,佢屋企係做生意既,佢擁有超過一百多個<高達>模型,當時係我心目中真係嘩然!中四o個年出黎做製衣廠part-time,出糧o個日,第一次堂堂正正咁行入去玩具店,我同個老細講:「唔該!我要呢盒模型!」第一次擁有自己買返黎既<高達>模型,當然係好開心,往後幾年,我都有繼續買我喜愛既<高達>模型。而阿媽通常都會話我o徒錢,仲成日比佢話我買o野”唔等駛”。

結婚之後,我仍然都有行玩具店,亦都有買<高達>模型返屋企,又通常都會比前妻話我:「都唔知道有咩咁好玩?」,妳當然唔會知道過中既樂趣!直到個女出世之後,佢開始同我爭玩具玩,前妻通常又會同我咁講:「你咁大個人做咩同個女爭野玩???」當然我用佐3日裝配出黎既<高達>模型,最終都係逃不過冇手冇腳既命運!可能比前妻話得多,慢慢,我就開始感到無味,曾經有段長達多年既時間,我都冇再行玩具店,如果經過旺角的話,我一定會兜路行,盡量唔會比自己經過洗衣街一帶。

同前妻分開之後,我一個人走到旺角居住,而洗衣街正正就係我屋企隔離,所以一放工,我都會經過係洗衣街o個倆間玩具店,又係發呆咁企係間鋪頭門外,眼定定咁望住個櫥窗,當然有時都有入去參觀o下,由於工作關係,我都只係望一望就算,因為都冇多餘時間去整理。有好幾次去日本旅行,我都專程搭JR去秋葉原既玩具店行o下,一行通常都大半日,當然都會買我既心頭好。

直到而家,我有時都會經過洗衣街既玩具店,我仍然都係會發呆咁企係度望住o個櫥窗,但個心好自然會想起:「人長大喇!望o下就好,唔一定要擁有!」

前年,我搬返黎大埔既時候,無意中發現,我多年前買落既<高達>模型,仍然好好咁保存係一個盒子裡面……

RSS feed for comments on this post. TrackBack URI

Leave a reply